باسكال صقر 1

قدّمت بها الفنانة باسكال صقر في بعض الحفلات التي أحيتها عام 1988 في سيدني

بْصَوتْهَا.. غَنِّتْ أَدَبْ جُبْرَانْ

هَـ الْـ كَانْ أَرْز الرَّبّ يُوحِيلُو

الْـ صَارِتْ حْرُوفُو خُبْز لِلْجُوعَانْ

وْكِل مَا تْدُوق الْخُبْز صَلِّيلُو

بْصَوتْهَا.. احْتَلِّتْ قَلبْ لُبْنَانْ

وِقْلُوبْنَا الْـ بِتْضَلّ تِشْكِيلُو

عَنْ لَوْعِة الْهُجْرَانْ وِالْحِرْمَانْ

عَنْ نَاسْ بَاعُوا الأَرْضْ بِالْكِيلُو

مْسَارِحْ جَرَشْ.. قرْطَاجْ.. وَينْ مَا كَانْ

شِهْدِتْ بِفَنَّا النَّادِر مْثِيلُو

يِمْكِنْ بَلابِلْ سَوْسَحِتْ أَكْوَانْ

أَوْ صَوْت نَايْ الرِّيحْ بِتْشِيلُو

آيِةْ جَمَالْ.. انْ شَافْهَا فَنَّانْ

بْيِكْسُرْ عَ إِجْرَيْهَا تْمَاثِيلُو

حَتَّى حَمَام الطُّهرْ وِالإِيمَانْ

مْنِ بْيَاضْهَا لَوَّنْ زَغَالِيلُو

وْوَرْد خَدَّا مْسَيَّج بْبُسْتَانْ

الْقَانُونْ عَمْ يِمْشِي مْقَابِيلُو

حَامِلْ عَدَالِه بْكَفِّة الْمِيزَانْ

وْهِيِّي بْكَفّ الْحَقّْ تُومِيلُو

وْقَلبْهَا الْمَجْرُوحْ عَ الأَوْطَانْ

حْكَايَاتْ أَجْمَلْ أَرْضْ تِحْكِيلُو

كِيفْ غَنَّاهَا النَّبِي سْلَيْمَانْ

وِاعْتَزّ فِيهَا صَوْت تِرْتِيلُو

وِالْجَائِزِه اللِّي تْعَلّقِتْ نِيِشَانْ

عَ صَدرْهَا.. شُو رِبْحِت جْمِيلُو

هَاكْ "الْكَمَالْ" الْـ سَارْقُو نيسَانْ

مِنْشَانْ يِضْوِي اللَّيْلْ قِنْدِيلُو

وِالْغَايِب الْمَحْرُوقْ بِالنِّيرَانْ

بْأُوفْ وِحْدِه النَّارْ تِطْفِيلُو

كْرَامِةْ الأَرْز الْـ حَارْسُو الدَّيَّانْ

كْرَامِةْ شَعْب مِشْتَاقْ حَتَّى يْعُودْ

بسْكَالْ.. يَا بَسْكَالْ غَنِّيلُو

**