قدّمت بها الفنانة جوليا بطرس عام 1988.. في الحفلة التي أحيتها في السبورت سنتر ـ سيدني.
يَا مَوْطنِي.. اللِّي مْقَدّسِه جْبَالَكْ
وْكِرْمَالْ عَيْنَكْ ضَحِّت رْجَالَكْ
مَهْمَا تْجَرِّحْ صَدْرَك الآلامْ
وْتِكْرُجْ عَ خَدَّكْ دَمْعِة طْفَالَكْ
وْمَهْمَا تْفَارِقْ لَيْلَكْ الأحْلامْ
وْتِتْشَرَّدْ بْهَالْكَايْنِه عْيَالَكْ
صَعْبِه خَيَالَكْ تِمْحَشُو الأَيَّامْ
وْهِيِّي الْـ غَنِّتْ عُمرْ "بِخْيَالَكْ"
وِجْنُوبَكْ اللِّي نَدْهِتُو بِكْلامْ
وْقَالِتْ: حَبِيبِي.. قِلْت: نِيَّالَكْ
تَا تْشِعّْ "شَمْس الْحَقّ" وِالإِلْهَامْ
حِمْلِتْ بِـ إِسْم الشَّعْب مِشْعَالَكْ
وْأَعْلامْ مِنْ كلّ الدِّنِي.. وْإِعْلامْ
وِقْفِتْ بِـ سِيدْنِي تْوَسِّعْ مْجَالَكْ
وْبَسْمِه حَزِينِه بْتِمّهَا بِتْنَامْ
يَا الْـ كِنْتْ ضِحْك وْكَيْفْ رِسْمَالَكْ
"بَسْمِه حَزِينِه" فَجّرِتْ أَنْغَامْ
وَقْت اللِّي صَرْخِتْ أُوفْ مُوَّالَكْ
صَارِتْ بِبَعْضَا تْكَبِّشْ الأَعْلامْ
يَا مَوْطنِي.. تَا يْحَيّكُوا شَالَكْ
صَرْخَه جْنُوبِيِّه بْوَجِهْ حُكَّامْ
بَعْدُنْ مَا عِرْفُوا يْرَيّحُوا بَالَكْ
صَرْخَه جْنُوبِيِّه بْوَجِهْ ظُلاَّمْ
مَنْعُوا صَلِيبَكْ يِغْمُر هْلالَكْ
صَرْخَه جْنُوبِيِّه لْشَعبْ مِنْضَامْ
وْرَغْم الظُّلمْ وِالْمَوْت غَنَّالَكْ
غْنَانِي انْسَرْقِتْ مِنْ هَدِيلْ حْمَامْ
مِنْ جُولْيَا بُطْرُسْ.. حَبِيبِتْنَا
الْـ ضَوِّتْ حَيَاتَا شْمُوعْ كِرْمَالَك
**