عايدة أبو جودة ـ ملحم بركات
ودّي يا صوتي ودّي
قدّمت بها الفنانة عايدة أبو جودة في إحدى الحفلات التي أحيتها في سيدني عام 1990.
وَدِّي يَا صَوْتِي وَدِّي
وْمَحِّي غُرْبِه مِسْوَدِّه
رَحْ يِخْلَصْ لَيْلِي الطَّوِيلْ
وْعَنْ رُوحِي تْرُوح الشِّدِّه
وْرَحْ خَلِّي الزَّهْرَات تْمِيلْ
جَايِي مْنِ بْلادِي "وَرْدِه"
رِيحِتْهَا بَخُّور تْقِيلْ
مْعَتَّقْ بِلْيَالِي جُرْدِي
أَلْوَانَا غَزْل قْنَادِيلْ
فِيهَا الدِّنْيِي بْتِسْتَهْدِي
وْبِتْطَيِّرْ حَوْلا زْغَالِيلْ
سِلْم وْخَيْر وْمَوَدِّه
انْ غَنِّتْ.. بِتْجِنّ مْوَاوِيلْ
وْرَدِّه بِتْسَابِقْ رَدِّه
وْمِنْ سَحْبِةْ "أُوفَا" مِنْشِيلْ
نْبِيدْ مْعَتَّقْ مَاوَرْدِي
بْتِرْقُصْ عَ شْفَافَا تْرَاتِيلْ
وْمَا بْتِتْعَبْ صَرْلاَ مُدِّه
"وْفَوْزِي" بَدُّو الْمُسْتَحِيلْ
وْهِيِّي تْقِلُّو: مَا بَدِّي
زَوْجِي مَحْبُوب وْزَنْكِيلْ
قِدَّامُو صَعْب تْهَدِّي
وْأَنَا مْنِ الشَّعْب الأَصِيلْ
الأَغْلَى مِنُّو مَا عِنْدِي
لُبْنَانِيِّه.. سْآلْ النِّيلْ
"أَحْلَى مْنِ الزَّنْبَقْ قَدِّي"
وْمَهْضُومِه.. وْخَدِّي جَمِيلْ
"أَنْعَمْ مِنْ قَمَر الْوَرْدِي"
فَنَّانِه.. انْ صَاحِتْ: يَا لِيلْ
عِدِّي يَا عْيُونِي عِدِّي
دْمُوع الْكَمَنْجَه بِتْسِيلْ
وِالدِّرْبَكِّه بِتْنَدِّي
بْرِنْسِيسَه.. زِيد التِّبْجِيلْ
وْلا تِسْأَلْ.. إِسْمَا مَشْهُورْ
وِبْيِعْبُدْ صَوْتَا الْجُمْهُورْ
هَيْدِي "عَايْدَه بُو جَوْدِه"..
**
ملحم.. بسّ
قدّمت بها الفنان ملحم بركات في بعض الحفلات التي أحياها في سيدني عام 1989
زَقّفُولُو.. وْكَبّرُوا الزَّقْفِه
السَّهْرَه اللَّيْلِه كْتِيرْ مُخْتِلْفِه
فَنَّانْ مِتْلُو مَا خَلَقْ أَللَّـه
انْ صَاحْ "أُوفْ".. الأُوفْ بِتْكَفِّي
بْتِطْرُبْ شَعبْ كَاس الْهَجرْ تَلاَّ
وْعَمْ يِشْرَبُو شَفِّه وَرَا شَفِّه
فَنَّانْ.. عَ وْتَارُو النَّغَمْ صَلاَّ
وْعَبَّى اللَّيَالِي نْجُومْ لِلشِّفِّه
غْنَانِيهْ عَ شْفَاف الدِّنِي كِلاَّ
وْبِالشَّرْق وَحْدُو دَايِر الدَّفِّه
خَلاَّ الْمُوسِيقَى تِرْقُص.. وْخَلاَّ
النَّار الْـ بِقَلْب قْلُوبْنَا تْطَفِّي
وْأَحْبَابْ عَ دْرُوب الْفَرَحْ دَلاَّ
وْلَوْلا حَنَانُو وَيْن بِتْصَفِّي
وْصَرْلاَ سْنَينْ.. الْحَرْب تِتْسَلَّى
بِبْلادْهَا.. وِشْعُوبْهَا تْصَفِّي؟!
يَا شِعرْ بِالْهُجْرَانْ شُو بْقِلاَّ
عَنْ فَنّ شَرْقِي مَا انْوَجَدْ صِدْفِه
كْرُومُو مْوَاسِمْ خَيْر عَ حِلاَّ
وِبْكِلّ لَحْظَه بْتِحْرُز الْقَطْفِه؟!
بْقِلاَّ: بْصَابِيعُو كَانْ يِغْزِلاَّ
نَغْمَاتْ عَ الآلاتْ مِصْطَفِّه
بْقِلاَّ: بْدُونُو الأَرْضْ يَا دِلاَّ
كِلاَّ وْكِبْرَا بْلاَ وَتَرْ.. نِتْفِه
بْقِلاَّ: عْرُوش الْفَنّ مِحْتَلاَّ
هُوِّي اللَّحنْ وِالصَّوْت وِالْكِلْمَاتْ
وِالْمِيجَانَا وِالأُوفْ وِالْهَيْهَاتْ
وِانْ قِلْتْ: مِلْحِمْ بَسّْ.. بِيكَفِّي
**
فرح الشرق
قدمت بها الفنان ملحم بركات، 1989
ـ1ـ
تْرَبَّى اللَّحنْ وِالصَّوْت عَ إِيدَيْهْ
وْشِرْبُوا الْقَصَايِدْ مِنْ دَمعْ عِينَيْهْ
وْصَارْ السَّهرْ.. عَ قَدّ مَا سِهْرُوا سَوَا
يْطَرْطِشْ نِدِي.. وْيِشْلَح نْجُوم عْلَيْهْ
ـ2ـ
وْفِرح الشَّرقْ لِمِّنْ خِلِقْ فَنَّانْ
بْيِمْحِي بْصَوْتُو غُرْبِة الإِنْسَانْ
وَدَّاهْ عَ سِيدْنِي سَفِير كْبِيرْ
حَامِلْ مَعُو.. بْدَال الْوَطَنْ.. أَوْطَانْ
ـ3ـ
مَارِدْ.. مَا بَدُّو الإِغْتِرَاب يْزِيدْ
وِيْعَشْعِش غْرَاب الضَّجَرْ بِبْلادْ
لِمِّنْ عِرِفْنَا نَاطْرِين الْعِيدْ
جَايِي تَا يِزْرَعْ هَجِرْنَا أَعْيَادْ
ـ4ـ
وْكِلّ مَا ضِعْنَا عَلَى دْرُوب الْحَيَاةْ
وْصَار الْحَكِي بَيْنَاتْنَا يْخَاطِرْ
بْتِحْكِي صَابِيعُو لِلْهَنَا حْكَايَاتْ
وْوَحْدُو عَ مَفْرَقْ حُبّنَا نَاطِرْ
ـ5ـ
تْفَيَّا الْمَجدْ بِـ فَيِّة كْفُوفُو
وَقْت اللِّي غَنَّى وِالْقَمَرْ عَ الْبَابْ
وْنِزْلِتْ سَمَا عَ الأَرْض تَا تْشُوفُو
بَرْكِي بِيرَجِّعْ بَدِرْهَا اللِّي غَابْ
ـ6ـ
طَقّ الْفَرَحْ.. لَوْلا فَرَحْ عِيدُو
وْضَاع النَّغَمْ.. لَوْلا أَنَاشِيدُو
وِالْعُودْ.. مَا دَوْزَنْ لَيَالِينَا
إِلاَّ بْرِيشِه حَامِلا بْإِيدُو
ـ7ـ
جُرْح الْقَلبْ.. مِينْ غَيْرَكْ بْيِلْحِمْ؟
مُشْ حَقّ تِتْرُك قَلِبْنَا يْفَحِّمْ
الإِيدَيْنْ رَحْ تِتْعَبْ مِنِ التِّلْوِيحْ
وِالشَّعْب.. كلّ الشَّعبْ.. عَمْ بِيصِيحْ:
وَيْنَكْ يَا مِلْحِمْ؟.. بَدّنَا مِلْحِمْ
**
ضيفنا الكبير
قدمت بها الفنان ملحم بركات، 1989
ـ1ـ
مْنِ الْقَلْبْ غَنَّى ضَيفْنَا الِكْبِيرْ
وْبَكَّى الشَّعبْ لِمِّنْ بِكِي هُوِّي
يَا دَمْعِة الإِخْلاصْ وِالتِّقْدِيرْ
طَمّنِي لُبْنَانْ.. مَهْمَا يْصِيرْ
رَاجْعِين نْعِيشْ بِالْقُوِّه
ـ2ـ
مْنِ الْقَلبْ غَنَّى.. وِالشّفَاف تْصِيحْ:
عِيدْهَا.. يَا سَيِّد الأَلْحَانْ
وْلِـمْ عَادْهَا.. فَكَّرْت إِنُّو الرِّيحْ
حِمْلِت بَشَرْ عَ شْفَافُن تْسَابِيحْ
تَا تْرَجِّعُنْ بِالدَّوْر عَ الأَوْطَانْ
ـ3ـ
وْلِكْ أُوفْ.. يَا بَا أُوفْ.. يَا بَا أُوفْ
وَقَّفْ بَشَرْ عَ الطَّاوْلات صْفُوفْ
هَيْدَا سَفِير الْفَنّ وِالأَمْجَادْ
حَامِلْ مَعُو مْنِ الشَّرْق صَوْت بْلادْ
زَقّفِيلُو.. زَقّفِي يَا كْفُوفْ
ـ4ـ
قَوُّوا الزَّقْفِه يَا حْبَاب الْقَلْبْ
مِنْشَانْ حَتَّى نْسَمّعُو هِيِّي
تَا يَعْرِف الْغِيَّابْ مِينْ بِتْحِبّْ
بِتْحِبّ بَعْد الرَّبّ.. أَرْز الرَّبّْ
وْفَنَّان حِمْل الأَرْزْ غِنِّيِّه
ـ5ـ
يَا كْفَرْشِيمَا.. شُو بَدِّي قُولْ
زْلاغِيطْ عَمْ تِسْتَقِبْلُو وِطْبُولْ
هَـ الْـ كَانْ إِبْنِكْ.. صَار إِبْن الْكلّْ
بْتِرْقُص قْلُوب النَّاس لِـمْ بِيطِلّْ
فَوْق صَرْخَات الْمَجِدْ مَحْمُولْ
ـ6ـ
طِلّْ دَخْلَكْ طِلّ حَاكِينَا
عِتْقُوا مْحَارِمْنَا عَلَى الْمِينَا
يَا حَبِيب النَّاسْ.. نِحْنَا نَاسْ
شْرِبْنَا الْغُرْبِه كَاسْ.. أَصْعَبْ كَاسْ
وْوَحْدَكْ يَا مِلْحِمْ فِيكْ تِحْيِينَا
**
راجع
إحدى حفلات الفنان ملحم بركات في سيدني.
راجع، لا تْخافُوا، راجِعْ
مِلْحِمْنَا، النّجْم السَّاطِعْ
مِنْ هَـ الْقَاعَه ما بْيِطْلَعْ
إِلاَّ وِالْفَجرْ طالِعْ
قدّمت بها الفنانة عايدة أبو جودة في إحدى الحفلات التي أحيتها في سيدني عام 1990.
وَدِّي يَا صَوْتِي وَدِّي
وْمَحِّي غُرْبِه مِسْوَدِّه
رَحْ يِخْلَصْ لَيْلِي الطَّوِيلْ
وْعَنْ رُوحِي تْرُوح الشِّدِّه
وْرَحْ خَلِّي الزَّهْرَات تْمِيلْ
جَايِي مْنِ بْلادِي "وَرْدِه"
رِيحِتْهَا بَخُّور تْقِيلْ
مْعَتَّقْ بِلْيَالِي جُرْدِي
أَلْوَانَا غَزْل قْنَادِيلْ
فِيهَا الدِّنْيِي بْتِسْتَهْدِي
وْبِتْطَيِّرْ حَوْلا زْغَالِيلْ
سِلْم وْخَيْر وْمَوَدِّه
انْ غَنِّتْ.. بِتْجِنّ مْوَاوِيلْ
وْرَدِّه بِتْسَابِقْ رَدِّه
وْمِنْ سَحْبِةْ "أُوفَا" مِنْشِيلْ
نْبِيدْ مْعَتَّقْ مَاوَرْدِي
بْتِرْقُصْ عَ شْفَافَا تْرَاتِيلْ
وْمَا بْتِتْعَبْ صَرْلاَ مُدِّه
"وْفَوْزِي" بَدُّو الْمُسْتَحِيلْ
وْهِيِّي تْقِلُّو: مَا بَدِّي
زَوْجِي مَحْبُوب وْزَنْكِيلْ
قِدَّامُو صَعْب تْهَدِّي
وْأَنَا مْنِ الشَّعْب الأَصِيلْ
الأَغْلَى مِنُّو مَا عِنْدِي
لُبْنَانِيِّه.. سْآلْ النِّيلْ
"أَحْلَى مْنِ الزَّنْبَقْ قَدِّي"
وْمَهْضُومِه.. وْخَدِّي جَمِيلْ
"أَنْعَمْ مِنْ قَمَر الْوَرْدِي"
فَنَّانِه.. انْ صَاحِتْ: يَا لِيلْ
عِدِّي يَا عْيُونِي عِدِّي
دْمُوع الْكَمَنْجَه بِتْسِيلْ
وِالدِّرْبَكِّه بِتْنَدِّي
بْرِنْسِيسَه.. زِيد التِّبْجِيلْ
وْلا تِسْأَلْ.. إِسْمَا مَشْهُورْ
وِبْيِعْبُدْ صَوْتَا الْجُمْهُورْ
هَيْدِي "عَايْدَه بُو جَوْدِه"..
**
ملحم.. بسّ
قدّمت بها الفنان ملحم بركات في بعض الحفلات التي أحياها في سيدني عام 1989
زَقّفُولُو.. وْكَبّرُوا الزَّقْفِه
السَّهْرَه اللَّيْلِه كْتِيرْ مُخْتِلْفِه
فَنَّانْ مِتْلُو مَا خَلَقْ أَللَّـه
انْ صَاحْ "أُوفْ".. الأُوفْ بِتْكَفِّي
بْتِطْرُبْ شَعبْ كَاس الْهَجرْ تَلاَّ
وْعَمْ يِشْرَبُو شَفِّه وَرَا شَفِّه
فَنَّانْ.. عَ وْتَارُو النَّغَمْ صَلاَّ
وْعَبَّى اللَّيَالِي نْجُومْ لِلشِّفِّه
غْنَانِيهْ عَ شْفَاف الدِّنِي كِلاَّ
وْبِالشَّرْق وَحْدُو دَايِر الدَّفِّه
خَلاَّ الْمُوسِيقَى تِرْقُص.. وْخَلاَّ
النَّار الْـ بِقَلْب قْلُوبْنَا تْطَفِّي
وْأَحْبَابْ عَ دْرُوب الْفَرَحْ دَلاَّ
وْلَوْلا حَنَانُو وَيْن بِتْصَفِّي
وْصَرْلاَ سْنَينْ.. الْحَرْب تِتْسَلَّى
بِبْلادْهَا.. وِشْعُوبْهَا تْصَفِّي؟!
يَا شِعرْ بِالْهُجْرَانْ شُو بْقِلاَّ
عَنْ فَنّ شَرْقِي مَا انْوَجَدْ صِدْفِه
كْرُومُو مْوَاسِمْ خَيْر عَ حِلاَّ
وِبْكِلّ لَحْظَه بْتِحْرُز الْقَطْفِه؟!
بْقِلاَّ: بْصَابِيعُو كَانْ يِغْزِلاَّ
نَغْمَاتْ عَ الآلاتْ مِصْطَفِّه
بْقِلاَّ: بْدُونُو الأَرْضْ يَا دِلاَّ
كِلاَّ وْكِبْرَا بْلاَ وَتَرْ.. نِتْفِه
بْقِلاَّ: عْرُوش الْفَنّ مِحْتَلاَّ
هُوِّي اللَّحنْ وِالصَّوْت وِالْكِلْمَاتْ
وِالْمِيجَانَا وِالأُوفْ وِالْهَيْهَاتْ
وِانْ قِلْتْ: مِلْحِمْ بَسّْ.. بِيكَفِّي
**
فرح الشرق
قدمت بها الفنان ملحم بركات، 1989
ـ1ـ
تْرَبَّى اللَّحنْ وِالصَّوْت عَ إِيدَيْهْ
وْشِرْبُوا الْقَصَايِدْ مِنْ دَمعْ عِينَيْهْ
وْصَارْ السَّهرْ.. عَ قَدّ مَا سِهْرُوا سَوَا
يْطَرْطِشْ نِدِي.. وْيِشْلَح نْجُوم عْلَيْهْ
ـ2ـ
وْفِرح الشَّرقْ لِمِّنْ خِلِقْ فَنَّانْ
بْيِمْحِي بْصَوْتُو غُرْبِة الإِنْسَانْ
وَدَّاهْ عَ سِيدْنِي سَفِير كْبِيرْ
حَامِلْ مَعُو.. بْدَال الْوَطَنْ.. أَوْطَانْ
ـ3ـ
مَارِدْ.. مَا بَدُّو الإِغْتِرَاب يْزِيدْ
وِيْعَشْعِش غْرَاب الضَّجَرْ بِبْلادْ
لِمِّنْ عِرِفْنَا نَاطْرِين الْعِيدْ
جَايِي تَا يِزْرَعْ هَجِرْنَا أَعْيَادْ
ـ4ـ
وْكِلّ مَا ضِعْنَا عَلَى دْرُوب الْحَيَاةْ
وْصَار الْحَكِي بَيْنَاتْنَا يْخَاطِرْ
بْتِحْكِي صَابِيعُو لِلْهَنَا حْكَايَاتْ
وْوَحْدُو عَ مَفْرَقْ حُبّنَا نَاطِرْ
ـ5ـ
تْفَيَّا الْمَجدْ بِـ فَيِّة كْفُوفُو
وَقْت اللِّي غَنَّى وِالْقَمَرْ عَ الْبَابْ
وْنِزْلِتْ سَمَا عَ الأَرْض تَا تْشُوفُو
بَرْكِي بِيرَجِّعْ بَدِرْهَا اللِّي غَابْ
ـ6ـ
طَقّ الْفَرَحْ.. لَوْلا فَرَحْ عِيدُو
وْضَاع النَّغَمْ.. لَوْلا أَنَاشِيدُو
وِالْعُودْ.. مَا دَوْزَنْ لَيَالِينَا
إِلاَّ بْرِيشِه حَامِلا بْإِيدُو
ـ7ـ
جُرْح الْقَلبْ.. مِينْ غَيْرَكْ بْيِلْحِمْ؟
مُشْ حَقّ تِتْرُك قَلِبْنَا يْفَحِّمْ
الإِيدَيْنْ رَحْ تِتْعَبْ مِنِ التِّلْوِيحْ
وِالشَّعْب.. كلّ الشَّعبْ.. عَمْ بِيصِيحْ:
وَيْنَكْ يَا مِلْحِمْ؟.. بَدّنَا مِلْحِمْ
**
ضيفنا الكبير
قدمت بها الفنان ملحم بركات، 1989
ـ1ـ
مْنِ الْقَلْبْ غَنَّى ضَيفْنَا الِكْبِيرْ
وْبَكَّى الشَّعبْ لِمِّنْ بِكِي هُوِّي
يَا دَمْعِة الإِخْلاصْ وِالتِّقْدِيرْ
طَمّنِي لُبْنَانْ.. مَهْمَا يْصِيرْ
رَاجْعِين نْعِيشْ بِالْقُوِّه
ـ2ـ
مْنِ الْقَلبْ غَنَّى.. وِالشّفَاف تْصِيحْ:
عِيدْهَا.. يَا سَيِّد الأَلْحَانْ
وْلِـمْ عَادْهَا.. فَكَّرْت إِنُّو الرِّيحْ
حِمْلِت بَشَرْ عَ شْفَافُن تْسَابِيحْ
تَا تْرَجِّعُنْ بِالدَّوْر عَ الأَوْطَانْ
ـ3ـ
وْلِكْ أُوفْ.. يَا بَا أُوفْ.. يَا بَا أُوفْ
وَقَّفْ بَشَرْ عَ الطَّاوْلات صْفُوفْ
هَيْدَا سَفِير الْفَنّ وِالأَمْجَادْ
حَامِلْ مَعُو مْنِ الشَّرْق صَوْت بْلادْ
زَقّفِيلُو.. زَقّفِي يَا كْفُوفْ
ـ4ـ
قَوُّوا الزَّقْفِه يَا حْبَاب الْقَلْبْ
مِنْشَانْ حَتَّى نْسَمّعُو هِيِّي
تَا يَعْرِف الْغِيَّابْ مِينْ بِتْحِبّْ
بِتْحِبّ بَعْد الرَّبّ.. أَرْز الرَّبّْ
وْفَنَّان حِمْل الأَرْزْ غِنِّيِّه
ـ5ـ
يَا كْفَرْشِيمَا.. شُو بَدِّي قُولْ
زْلاغِيطْ عَمْ تِسْتَقِبْلُو وِطْبُولْ
هَـ الْـ كَانْ إِبْنِكْ.. صَار إِبْن الْكلّْ
بْتِرْقُص قْلُوب النَّاس لِـمْ بِيطِلّْ
فَوْق صَرْخَات الْمَجِدْ مَحْمُولْ
ـ6ـ
طِلّْ دَخْلَكْ طِلّ حَاكِينَا
عِتْقُوا مْحَارِمْنَا عَلَى الْمِينَا
يَا حَبِيب النَّاسْ.. نِحْنَا نَاسْ
شْرِبْنَا الْغُرْبِه كَاسْ.. أَصْعَبْ كَاسْ
وْوَحْدَكْ يَا مِلْحِمْ فِيكْ تِحْيِينَا
**
راجع
إحدى حفلات الفنان ملحم بركات في سيدني.
راجع، لا تْخافُوا، راجِعْ
مِلْحِمْنَا، النّجْم السَّاطِعْ
مِنْ هَـ الْقَاعَه ما بْيِطْلَعْ
إِلاَّ وِالْفَجرْ طالِعْ
**
